រឿង វិញ្ញាណឆ្កែជួយ ~ រៀងនិទាន និង ប្រលោមលោក

រឿង វិញ្ញាណឆ្កែជួយ

នាង នី ជាអ្នកធ្វើការនៅហាងមួយកន្លែង ។ នាងមានរាងរៅមុខមាត់ស្រស់ស្អាត ។ នាងជាកូនស្រីតែម្នាក់គត់ ស្ថិតនៅក្រោមការគ្រប់គ្រងអប់រំរបស់ម្ដាយ ដែលជាស្រីមេម៉ាយ ប្ដីស្លាប់ តាំងពីនាងនីនៅតូចម្ល៉េះ ។ នាងក្រមុំរស់នៅជាមួយនឹងម្ដាយតែពីរនាក់ម៉ែ និងកូន យ៉ាងមានសេចក្ដីសុខ ផ្អែកលើប្រាក់ខែរបស់នាង នី និងចំណូលបន្តិចបន្តួចតាំងពីដើមមក ។

នីអើយ…! នៅផ្ទះយាយ យែម មានមេឆ្កែទើបនឹងកើតកូនដល់ទៅប្រាំក្បាល យកមួយក្បាលមកចិញ្ចិម តើល្អទេ ? ម៉ែស្រែកសួរ មុនពេល នី ឈានជើងចេញផ្ទះទៅធ្វើការ ។

តាមចិត្តម៉ែចុះ !! ល្អម្យ៉ាងដែរ គ្រាន់បានវាជួយចាំផ្ទះ ! នាងក្រមុំតប ហើយក៏ធ្វើដំណើរចេញទៅ ។

លុះដល់ពេលល្ងាច ពេលនាងត្រឡប់មកពីធ្វើការវិញ ក៏ឃើញកូនឆ្កែតូចគួរឲ្យស្រឡាញ់មួយក្បាលរត់មកទទួលនាង ។

គួរឲ្យស្រឡាញ់ណាស់ម៉ែ ! ដាក់ឈ្មោះវាអាលុកៗតែម្ដងទៅម៉ែ ព្រោះវាឆ្កែឈ្មោល !

ថ្ងៃខែចេះតែកន្លងផុតទៅ អាលុក ធំពេញរូបពេញរាង ។ វាជាឆ្កែឆ្លាតណាស់ ទើបធ្វើឲ្យម្ចាស់ស្រឡាញ់ពេញចិត្តវាយ៉ាងខ្លាំង ។ នាងនី តែងមាននំបន្តិចបន្តួច ផ្ញើវារាល់ថ្ងៃមិនដែលខាន ។ ជារៀងរាល់ព្រឹក អាលុកតែងតែជូនដំណើរនាងនី ទៅឡើងរថយន្តក្រុង និងរង់ចាំទាល់ តែម្ចាស់វាបានឡើងរថយន្តក្រុង ទើបអាលុកត្រឡប់មកវិញ ។

លុះដល់ពេលនាងនី ត្រឡប់មកពីធ្វើការ អាលុក រត់ទៅទទួលដល់កន្លែងចុះពីលើរថយន្ត ដើម្បីជូនដំណើរត្រឡប់មកផ្ទះវិញ ។ វាតែងតែធ្វើដូច្នេះ រាល់ៗថ្ងៃមិនដែលខាន រហូតអ្នកជិតខាងនៅម្ដុំនោះ សរសើរស្រឡាញ់ចូលចិត្តវាគ្រប់ៗគ្នា ។

អស់រយៈពេលមួយឆ្នាំកន្លងផុតទៅ ឆ្នាំនេះ នាងនី បានទទួលតំណែងខ្ពស់ជាងមុន ទើបធ្វើឲ្យនាងនី មានការងារ កាន់តែច្រើនឡើង ។ នាងត្រឡប់មកផ្ទះយប់ជាងធម្មតា ។ អាលុកដេកចាំម្ចាស់វាមិនដែលខាន ទោះបីជាយប់យ៉ាងណា បើមិនឃើញម្ចាស់វាទេ វាមិនទៅផ្ទះមុនជាដាច់ខាត ។ នេះជាថ្ងៃដំណាច់ឆ្នាំ នៅកន្លែងធ្វើការមានរៀបចំពិធីជប់លៀង ។

នាងនីត្រូវត្រឡប់មកផ្ទះវិញយប់ជាងធម្មតា នាងបារម្ភដល់អាលុកដែលនៅរង់ចាំនាង មិនដឹងថាវាឆ្ងល់យ៉ាងណាទេ ។ នឹកអាណិតឆ្កែពេក នាងក៏សុំចៅហ្វាយត្រឡប់មកផ្ទះមុនគេ ។ នាងចុះពីរថយន្ដវិញ ងាកឆ្វេងងាកស្ដាំ សម្លឹងរកអាលុកបណ្ដើរ ហៅបណ្ដើរៈ

អាលុកៗ ! អាលុកៗ !

គ្មានឃើញស្រមោលរបស់វាឡើយ ។ នាងរអ៊ូថា : យប់កាន់តែងងឹត ស្ងាត់ក៏ស្ងាត់ អាលុក ក៏វាមិនទទួលទៀត ! ។ នាងក្រមុំងាកឆ្វេង ងាកស្ដាំបណ្ដើរ នៅពេលដែលកំពុងធ្វើដំណើរមកផ្ទះ ក្រែងបានឃើញអាលុកមកទទួល ព្រោះនាងកំពុងតែខ្លាចណាស់ ។

ភ្លាមនោះ នៅក្នុងវាលស្មៅក៏ក្រាស់ ស្រាប់តែមានរាងកាយបុរសពីរនាក់វែកស្មៅស្ទុះចូលមករកនាងក្រមុំ រួចចាប់ទាញនាងចូលទៅវាលស្មៅ ។

ជួយផង ! ជួយផង ! នាងនី ស្រែកបានតែប៉ុណ្ណោះ ក៏ស្ងាត់ទៅវិញព្រោះជនអាក្រក់ពីរនាក់នោះ យកដៃមកក្ដោបមាត់របស់នាងជាប់ ព្រមទាំងស្រែកគំរាមថា :

ឈប់ស្រែក ! ប្រយ័ត្នកូនកាំបិតនេះ ! វាចូលទៅក្នុងបំពង់កណា៎ ! នាងភិតភ័យយ៉ាងខ្លាំង នាងគិតថា នាងមិនអាចរស់តទៅទៀតបានទេ ព្រោះអាពីរនាក់នោះ ក្រោយពីពួកវាចាប់រំលោភនាងរួចហើយ ប្រាកដជាសំលាប់នាងចោល ជាទំលាប់របស់វាមិនខាន ។

នៅពេលអាចោរពីរនាក់នោះចាប់ផ្ដើមចាត់ការរំលោភនាង ក៏ស្រាប់តែ ឮសម្លេងឆ្កែព្រុសឡើងយ៉ាងសង្ខុញ ។

អា លុក ! នាងនី ស្រែកចេញមក ដោយក្ដីរីករាយ ។ អាលុក ខាំត្របាក់ជនអាក្រក់ទាំងពីរ ដាច់សាច់ទាំងដុំ រហូតឈាមជោគខ្លួន ។

សម្លេងស្រែកឡូឡាទាំងឆ្កែ ទាំងមនុស្ស បានឮដល់ អ្នកជិតខាងនៅម្ដុំនោះ នាំគ្នាផ្អើលរត់មកជួយចាប់ជនអាក្រក់ទាំងពីរនោះបាន ។

ពួកវាស្រែកថ្ងូរ ព្រោះឈឺនឹងចង្កូមឆ្កែ ដែលបានខាំពួកវាឡើងសុះពេញខ្លួន ។ នាងក្រមុំងាករកអាលុក ដោយក្ដីបារម្ភ ព្រោះឃើញពួកចោរ ចាក់ត្រូវពីរកាំបិតដែរ ។ នាងនីស្រែករកឆ្កែទាំងទឹកក្នែក :

អាលុ ! អាលុក ! ទៅណាហើយ ! ប្រសិនជាមិនបានអាលុកជួយនាងខ្ញុំមិនដឹង ជាយ៉ាងណាទេ ។

រកអាលុក ឯណាទៀតនាង ? អ៊ំម្នាក់នៅក្បែរផ្ទះប្រាប់ថា អាលុកត្រូវរថយន្ដបុកងាប់តាំងពីរសៀលម៉ោងបីម៉្លេះ នៅពេលវាមកឈរចាំនាង នី ត្រឡប់មកពីធ្វើការវិញ ។ ម្ដាយរបស់នាង បានយកសពរបស់វា ទៅទុកឯផ្ទះហើយ មិនទាន់យកទៅកប់ទេ ព្រោះចង់ឲ្យនាងមកឃើញសិន ។ នាងក្រមុំក៏ប្រកែកថា :

មិនពិតទេអ៊ំ ! អាលុក បានមកជួយខ្ញុំអំបាញ់មិញប្រាកដណស់ ! មើលចុះ អាពីរ នាក់នោះ ត្រូវអាលុក ខាំឡើងសុះអស់ហើយ ។ វាប្រាកដជានៅផ្ទះ ខ្ញុំទៅមើលវាហើយ ! និយាយចប់នាង នីរត់ទៅផ្ទះយ៉ាងលឿន ។ ពេលទៅដល់នាងប្រញាប់សួរទៅម្ដាយថា :

ម៉ែ ! ម៉ែ ! អាលុក នៅឯណា ?

វាងាប់បាត់ហើយកូន ! នោះសពរបស់វា នៅក្រោមដើមស្វាយឯណោះ !

នាងនីស្រែកយំយ៉ាងសោកស្ដាយ ស្ទុះរត់ទៅមើល ឃើញវាងាប់មែន ដេកឡើងរឹងខ្លួនទៅហើយ ។ ប៉ុន្តែ អ្វីធ្វើឲ្យនាងនី មានការភ្ញាក់ផ្អើលកាន់តែខ្លាំង ថែមទៀតនោះ គឺនៅលើខ្លួនរបស់ វាមានស្នាមរបួសដោយសារផ្លែកាំបិតពួកចោរចាក់ ដូចដែលនាងបានឃើញនៅពេលវាកំពុង តែជួយនាងមែន ។ នាងបានត្រឹមតែឆ្ងល់តែម្នាក់ឯង ព្រោះវាជារឿងមិនគួរឲ្យជឿបាន ៕