និស្ស័យស្នេហ៍កម្ម និស្ស័យស្នេហ៍កម្ម

 

_អនិច្ចា! ជីវិតគន់គិតលែងយល់

រឿងស្នេហ៍អំពល់វិលវល់ខ្វល់ក្រៃ

ស្នេហ៍ធ្លាប់ស្មោះស្ម័គ្របែរប្រែប្រល័យ

ជាតិនេះស្រមៃក្សិណក្ស័យស្នេហ៍ពិត។

_រស់រានសព្វថ្ងៃឥតន័យខ្លឹមសារ

រឿងរ៉ាវស្នេហាចុកផ្សាដួងចិត្ត

រងកម្មរាប់ឆ្នាំប្រចាំជីវិត

ស្នេហ៍ឥតអាណិតប្តូរចិត្តមានថ្មី។

_ស្នេហ៍ធ្លាប់កៀកកិតជិតកាយបង្កើយ

សាសងឆ្លងឆ្លើយសូរសៀងសម្តី

ឥឡូវព្រាត់ឆ្ងាយដូចមេឃនិងដី

បងមានគូថ្មីធ្វើឫកកន្តើយ។

_បងបោះបង់ចោលកណ្តោចកណ្តែង

ដូចលេបគ្រាប់ស្លែងលែងស្តីឆ្លងឆ្លើយ

ល្វីងជូរចត់ណាស់ណ៎ានឹមនួនអើយ!

ជាតិនេះស្គាល់ហើយគេងកើយក្តីទុក្ខ។

_ស្រែកប្រាប់មេឃាទាមទារត្រូវខុស

ម្តេចលោកដាក់ទោសឲ្យរស់ឥតសុខ

ខ្ញុំអ្នកស្មោះត្រង់ម្តេចចងចាប់ទុក្ខ

ឃុំឃាំងដាក់គុកកម្មស្នេហ៍លោកិយ។

_ហេតុអ្វីចិត្តគេរេរាប្តូរផ្លាស់?

សម្តីក្រឡាស់បោកប្រាស់ផ្លាស់ថ្មី

ចាកចោលរូបខ្ញុំទុក្ខធំស្ទើរក្ស័យ

ចិត្តឥតប្រណីគ្មានស្រណោះស្តាយ។

_ស្រណោះអតីតធ្លាប់ជិតជួបជុំ

ស្រណោះធ្លាប់យំធ្លាប់សើចសប្បាយ

ស្រណោះធ្លាប់គេចពាក្យពេជន៍ពុកម្តាយ

ស្រណោះចិត្តកាយបាយទឹករួមគ្នា។

_ស្រណោះពន់ពេកស្រែកយំអង្វរ

អនុស្សាល្អបវរជានា

ស្រណោះរួមសុខទុក្ខជាមួយគ្នា

លំបាកវេទនាជិតគ្នាត្រសង។

_ស្រណោះសម្តីខន្តីវាចា

ពិតស្មោះស្នេហាជីវ៉ានួនល្អង

ស្រណោះទង្វើធ្វើខុសម្តងៗ

ស្រណោះកន្លងសូមផ្សងគ្រប់ជាតិ។

_ស្រណោះកន្លែងប្រលែងគ្នាលេង

ស្រណោះបទភ្លេងភ្លើងភ្លឺព្រោងព្រាត

ស្រណោះបងរាំអែបអូនឥតឃ្លាត

ស្រណោះរសជាតិជក់ចិត្តសប្បាយ។

_ស្រណោះស្នាមស្នេហ៍អង្អែលថែថើប

អារម្មណ៍ធ្លាប់ស្រើបស្រុលស្រាលសប្បាយ

កាយធ្លាប់កៀកកិតជិតឥតជិនណាយ

ពេលនេះប្រុសឆ្ងាយកាត់កាយឌឺដង។

_ដៃធ្លាប់អង្អែលថ្នមអង្គកាមា

ស្មារតីហានក្លាទៅណាត្រសង

ហត្ថធ្លាប់ក្រសោបឱបអង្គឃុំគ្រង

ឥឡូវនួនល្អងចម្លងអ្នកក្រៅ។

_បាត់បង់ស្នាមស្នេហ៍ធ្លាប់ថែថ្នមថ្នាក់

ទឹកធ្លាប់ត្រជាក់បែរប្រែជាក្តៅ

មេឃធ្លាប់ស្រទុំប្រែក្រហមឆ្អៅ

បាយក្លាយជាឆៅទៅជាអង្ករ។

_សមុទ្រទឹកសាបក្សោះអស់អំបិល

ព្រៃប្រែរេចរីលលែងស្រស់បវរ

ទឹកហូរបញ្ច្រាស់កាត់ផែនដែនថ្ម

ខ្មៅប្រែជាសស្ករផ្អែមថែមប្រៃ។

_អប្សរារូបស្រស់តែអស់ញញឹម

សត្វចិញ្ចឹមតែបែរតដៃ

មនុស្សរស់សោយសុខត្រូវទុក្ខប្រល័យ

ជីវិតមានន័យតែនិស្ស័យកម្ម។

_ច្រមុះធ្លាប់ហិតគំនិតធ្លាប់យល់

កាយធ្លាប់ប៉ះពាល់ចិត្តធ្លាប់ចងចាំ

បេះដូងរំជួលក្តុកក្តួលប្រេះស្រាំ

ភ្នែកឈឺរកាំចំណាំលែងបាន។

_ត្រចៀកលែងស្តាប់សូរស័ព្ទអ្វីៗ

មាត់លែងហាស្តីស្គមស្គាំងអង្គប្រាណ

វិញ្ញាណទាំងអស់បាត់បង់ហួសស្មាន

លែងចងតាមដានរឿងអូននិងបង។

_គេមានអ្វីទៅពាលពៅជ្រើសយក

ហេតុអ្វីពន្លកពន្លិចនួនល្អង

ឲ្យលង់លិចបាត់កាត់ផ្តាច់ចំណង

រសាត់សៅហ្មងម្តងហើយម្តងទៀត។

_មានអ្វីបណ្តាយចិត្តអប្រិយ

ទើបភ្លេចអ្វីៗអស់ន័យជួជាតិ

លបលួចប្រហារសាវ៉ាល្បិចស្នៀត

អូនប្រែចោលម្សៀតមារយាទអ្នកស្រែ។

_ស្នេហ៍អូនដូចភ្នំធំធេងពេកណាស់

ចិត្តរឹតមាន:ជម្នះពុកម៉ែ

លះបង់គ្រប់យ៉ាងសាងសង់ស្នាមស្នេហ៍

ស្មោះឥតកែប្រែថ្នមថែស្នេហ៍ពិត។

_ឥឡូវបង់បាត់ដូចយប់ស្ងាត់ឈឹង

ផែនដីឈប់ទ្រឹងទឹករីងរឹងឬទ្ធឹ

ដូចដឹងដៃដើរក្នុងទីងងឹត

លង់ផុងគំនិតចិត្តជាប់ចំណង។

_ឋានសួគ៌សោយសុខឥតទុក្ខលាយឡំ

បែរប្រែភក់ជ្រាំត្រាំគ្រាកន្លង

ស្រីផ្សេងប្រឡាក់ដាក់ថ្នាក់ទាក់ទង

ប្រុសភ្លេចនួនល្អងសាសងគេវិញ។

_ចិត្តប្រុសដូចក្តៀងមិនទៀងទាត់សោះ

ស្នេហ៍អូនខំស្មោះគេដោះដូរទិញ

ដកចេញមិនខាតឃាំងឥតចំណេញ

បងស្នេហ៍គេវិញអូនវិលវង្វេង។

_ភរផែនដែនដីឥតន័យខ្លឹមសារ

ប្រែប្រួលសាវ៉ាស្នេហាកឹបកេង

មិនស្ម័គ្រមិនស្មោះដូរដោះលលេង

ទុក្ខស្នេហ៍ដូចល្បែងលូកលេងប្រហារ។

_ឧ: ឱ!ទេវតាមេត្តាមើលផង

ទុក្ខធំកន្លងចុកចាប់ឱរ៉ា

នរណាដោះទុក្ខរស់សុខធម្មតា

បើក្នុងចិន្តាកត់ត្រាចងចាំ។

_ចិត្តចង់បំភ្លេចគេចកែការពិត

រំដោះជីវិតឈប់គិតរងកម្ម

កាត់កន្ទុយលាបកំបោរចំណាំ

ថារាប់រយឆ្នាំឈប់ចាំប្រុសហើយ។

_ប្រាយប្រាប់ខ្លួនឯងពីថ្ងៃនេះទៅ

ឈប់អាល័យនៅត្រូវជាសះស្បើយ

ត្រូវងើបមុខឡើងនិយាយឆ្លងឆ្លើយ

ជាតិនេះហួសហើយគ្មានឡើយស្នេហ៍ពិត៕

ដោយ អែនជែល

Posted in: ព័ត៌មានជាតិ